14 September 2007

حوار داخلى


حوار داخلى يدور داخل كل النساء .......وفيه ستات تخرجه من قلبها على لسانها وستات تانيه تفضل كتماه فى قلبها لحد ما تطق وتموت بحسرتها كل ست نفسها تبقى بطله لفيلم رومانسى جميل لكن للاسف البطل دايما مش موجود وهى جواها كتير وشايله كتير ونفسها توقفه قدامها كده وتقوله .......اسمع بقى

ايه اللى ممكن اكون محتاجاه منك عمرك سالت نفسك السؤال ده ؟؟؟ انا محتاجه تكون معايا محتاجه لحبك محتاحه لقربك منى عايزه احس بلمسه حنانك عايزه اسمع منك كلمه حلوه من كلام زمان عايزه وقت من وقتك عايزه نخرج سوا عايزه ورده تهديهالى عايزه هديه مش مهم هى ايه ولا قيمتها ايه بس حلاوتها انها من غير مناسبه عايزه رساله حب حلوه تبعتهالى وانت فى شغلك عايزه ابتسامه من شفايفك ونظره اعجاب من عيونك لما تشوفنى وكانى الست الوحيده اللى عيونك بتشوفها عايزه لما تخدنى فى حضنك انسى الدنيا وهمومها ..وده كان بيحصل قبل كده من غير ماطلبه ايه اللى جرى علشان مايحصلش دلوقتى ؟؟ والاكيد طبعا انها مش هتلاقى اجابه للسوال ولا اجابه لمطالبها مع ان الاجابه واضحه قدام عنيها وهى ان ده احساس هو مش حاسه تجاهها علشان يقدر يعبر عنه بالافعال دى بس ياترى هى هتفضل عامله نفسها مش واخده بالها لحد امتى ؟؟ ومش عايزه تصدق ان مشاعره اتغيرت لحد امتى؟؟ اكيــــــد مش كتيـــر

61 comments:

محمد عبد الغفار said...

يا خبر كل دى طلبات

.:.-=- ELGaZaLy-=-.:. said...

عايزه وقت من وقتك عايزه نخرج سوا عايزه ورده تهديهالى عايزه هديه مش مهم هى ايه ولا قيمتها ايه بس حلاوتها انها من غير مناسبه عايزه رساله حب حلوه تبعتهالى وانت فى شغلك عايزه ابتسامه من شفايفك ونظره اعجاب من عيونك لما تشوفنى وكانى الست الوحيده اللى عيونك بتشوفها عايزه لما تخدنى فى حضنك انسى الدنيا وهمومها ..وده كان بيحصل قبل كده من غير ماطلبه ايه اللى جرى علشان مايحصلش دلوقتى ؟؟ والاكيد طبعا انها مش هتلاقى اجابه للسوال ولا اجابه لمطالبها
---------------------------


احينا لا يمكن التعليق الا بنص الكلمات...

همممممممممممممممم

ليا عودة

سهر الليالى said...

محمد عبد الغفار
تصدق انى كنت هكتب انه لو رد عليها هيكون ده بالظبط رده (ايه كل الطلبات دى) بس قولت مافيش داعى للاحباط واكيد حد غيرى هيكتبها وجت منك انت ماشى يا محمد باشا:)) وحمدلله على السلامه .تحياتى

سهر الليالى said...

الغزالى
ايه هى المطالب دى صعبه قوى كده على الرجاله ولا صدمتك ولا ايه حسيتك مصدوم لدرجه انك مش عارف تعلق ولا ترد ..كده برضه بس مستنيه ردك وعودتك بعد امتصاص الصدمه يا جميل :)تحياتى

voice of love said...

يعنى هوه لازم احنا اللى نطلب
مفيش واحد يحس من نفسه كده بقيمة الكنز اللى فى ايده
ليه نبقى مجبرين على تسول الحب ؟؟
كل سنة وانتى طيبة وبألف خير
تحياتى

سهر الليالى said...

voice of love
يحس ايه يا بنتى خلى الطابق مستور ولا يحوق معاهم الكلام ده ولما تشحتيه برضه ولا يقصر فيهم ودن من طين والتانيه من عجين بس بقى هتودينا فى داهيه شكلك كده
خير ان شاء الله ....كل سنه وانتى طيبه يا سكر

عصفور بلا أجنحة said...

كلامك جميل و 100 فى100
كل سنة وانتى طيبة

سهر الليالى said...

عصفور بلا أجنحه
انتى اللى جميله وكل سنه وانتى كمان طيبه نورتينى

Shreif fahmy said...

من غير تكلف ولا مقدمات نورتي مدونتك مرة تانية ويارب تفضلي على تواصل معانا بتعليقاتك التي يغلفها دائما رقة الاحساس بالكلمات المكتوبة
وكل سنة وأنتي وأسرتك وكل اللي تحبيهم بخير

في الحقيقة لاتتخيلي ياسيدتي كم من السعادة التي أحسست بها عند قرائتي لتعليقك على يوميات محتار من السنترال خاصة عندما يصدر من شخص لايشوب رأيه أي مجاملة شكرا لك سيدتي

وأخيرا تعليقي

عندما أخبرته بأن بطلة سطورك يملاؤها الشجن منه ومن إهماله قال لي هذه الكلمات
بتبعديني عن حياتك بالملل
وخلتيني اقول خلاص مافيش أمل
استمري هتخسريني
استحالة هتكسريني
وحسسيني انك حجر
او ورده دبلت ع الشجر
صبرت صبر غريب رهيب لا يحتمل
عملت ايه يجرح كرامتك
كل اللى ممكن اعمله معاكي اتعمل
بتوهميني ان الحكاية بتنتهي
ابعد وقبل ضياعي منك تندمي
مابقتش بعرف دمعتك من ضحكتك
أصرخ مافيش ولا صرخة مني تسكتك
ما عرفش ليه بتعذبيني
لو بجرحك امشي وسيبيني
ساكته الحياه بينك وبيني
احساسي بيكي راح اكيد
مش محتمل

GEBSON said...

ya sety walahy mana 3aref a3mel eih ma3aky?
howa keda el setat 3amla zay el kotat takol we tensa.
ya benty el masha3er zay ma heia bas enty ely mosh wa7'da balek.
rakezy bas

7abet amasy 3aleky wa7ashtony awey

kol sana we enty taiba

ramdan kareeem

gebson

سهر الليالى said...

Shreif fahmy
ايه ده كله ياشريف ومن غير تكلف ولا مقدمات ياسيدى ربنا يخليك وكل سنه وانت طيب ..بس ليه الاغنيه دى تكون هى الرد الملل بييجى من الروتين والست اللى تطلب احساس وحب متجدد ماتبقاش بتحب الروتين ولا الملل مش كده ولا ايه

سهر الليالى said...

GEBSON
اولا حمدلله على السلامه بما انك مقاطع البلوجات كلها من فتره وياريتك ماتسبناس تانى علشان بتوحشنا بجد
وثانيا بقى ايه الدليل على انها ماتغيرتش بس هو يعمل حاجه واحده من دول وانا اصدق انها ماتغيرتش ومش هقدر ازعلك حاضر يا سيدى هركز وابص كويس حواليا يمن الاقى دليل واحد على حبه واهتمامه اللى انا عايزاه .وبعدين يمكن انا بقول كده بدلع مثلا ولا طمعانه فى اكتر من اللى هو بيدهولى اى خدمه مش هرفضلك طلب علشان غلاوتك عندى.. تحياتى وماتغبش تانى كده

سندباد said...

ليس دفاعا عن الرجل او عن المراة وليس تبريرا لكل الاشياء التي تطلب من الطرفين ولا تجد صدي لدي الاخر ولكن يجب ان نعترف ونقر اننا كثيرا ما نعتقد ان الحب في حد ذاته علاقة منتهية رغم ان الحب كائن يجب ان نرعاه ونهتم به ونحافظ عليه يجب ان نقر ونعترف ان الضغوط المادية والاجتماعية تعيقنا كثيرا عن التعبير عن مشاعرنا
ولكن الحب الحقيقي هو الذي يقف امام كل الظروف والتحديات
ولكن اولا يجب ان نفهم ما هو الحب الحقيقي
تحياتي

micheal said...

شعرت جدا بمدي الحاجه الي هذا الاحتياج
كلامك جميل
تحياتي لكي

سهر الليالى said...

sendbad
تعليقك فى منتهى الواقعيه لكن يجب ان لا ننسى سيدى الفاضل ان المشاعر والعاطفه جزء هام من حياه المرأه لا تستطيع ان تعيش بدونه واعتقد ان الرجل كذلك وان كان بنسبه اقل من المرأه فمن الصعب ان تقبل اى امرأه عذر اقتصادى او اجتماعى او ايا كان يمنع عنهاتلك الاحاسيس
تحياتى

سهر الليالى said...

مايكل
ربنا يخليك يا مايكل ومبسوطه انى قدرت اوصل الاحساس ده ليك وياريت يوصل لكن اللى يقرأه:))
تحياتى

Anonymous said...

السلام عليكم ورحمة الله وبركاته
يمكن دي أول مرة أعلق على مدونة من مدوناتك فأهلا بيا طبعا

موضوع ان الزوجة محتاجة من زوجها كلمات حب واطراء وهدايا من النوع اللي هي بتحبه ده شيء ضروري جدا ولا غنى عنه بالفعل وأقدر أقول باختصار إن حل المشكلة اللي بتشتكي منها كتير من الزوجات إنه يكون في بينهم حوار ونقاش وكل واحد يطلع اللي في قلبه للتاني بلا خجل أو خوف أو خداع وكل واحد يحترم رغبة التاني كويس جدا ويطبقها ولو واحد فيهم عامل ودن من طين وودن من عجين كما هو حال بعض الناس يبقى على الطرف التاني إنه يحاول معاه مرة واتنين وتلاتة وينبهه إنه ملوش غيره في الدنيا وإنه مينفعش يفكر في حد تاني يديله اللي هو عايزه ... هي مشكلة بسيطة فعلا ولكن مع الوقت بتتراكم على بعضها وتكبر لغاية لما تحصل بلاوي انتوا عارفينها كويس وربنا يستر علينا وعليكم
والسلام ختام

Ahmad Hegab said...

تحياتى يا سهر

بجد عجبنى الكلام أوى

كل سنه و انت طيبه

أسوور said...

البوست رائع ومنشور عندى بالحرف

يستحق النشر فى كل مدونة

سهر الليالى said...

ياسمين
مش للدرجه دى يا ياسمين كل مدونه مره واحده يارب يخليكى يا قمر والله ما فى اروع منك
تحياتى

The Alien said...

ف البداية أنا عايز أقول إن أنا كمان نفسي ف كل دا

معتقدش إنها ممكن تقله الكلام دا
واضح إن العلاقة وصلت ما بينهم لمرحلة صعبة
إنه مش حاسس بيها ومش ملبي إحتياجاتها
وفعلا مشاعره إتغيرت
بس أكيد السبب مش عنده هو لوحده

تحياتي

truelove said...

الغريبة ان ده كله كان بيسعى اليه وهما لسة في الخطوبة لحد ما تملكها وبعدين لما تكون هي الي عاوزه مش بيحس بيه تحياتي لفكرتك العبقرية يا قمر

سهر الليالى said...

Ahmed Almuslim
طبعا اهلا بيك يا احمد نورت المدونه كلها...وانت عندك حق طبعا الواحد مش المفروض يسكت عن المطالبه بحقوقه والست بطبيعتها زنانه ولا تمل من الكلام ولازم تقوله مره واتنين وعشره لكن ماتنساش ان فيه رجاله برضه زى التماثيل مهما تقول ليهم مافيش فايده لو هو شايف ان دى طلبات سخيفه او مالهاش معنى لو قولتها طول عمرك ولا هتفرق معاه
تحياتى

سهر الليالى said...

ahmEd_H
كل سنه وانت طيب يا احمد ورمضان كريم
مبسوطه ان الكلام عجبك والله :))تحياتى

سهر الليالى said...

The Alien
كلنا نفسنا ان اللى بنحبهم يهتموا بينا ويقدرونا..بس على فكره احيانا بيحصل برود فى العلاقه من غير ماتكون المشاعر اتغيرت وده اول شرخ يبهدد بانهيار العلاقه علشان كده الست بتقول انا عايزه وعايزه لانها بتحس انها بدات تفقد احساسها بالرضا وفقدان الرضا سيليه فقدان اشياء اخرى كثيره
تحياتى

سهر الليالى said...

truelove
اهلابيكى نورتى المدونه ...الاغرب بقى انهم بينسوا كل حاجه تقريبا قالوها وعملوها او يقولك خلاص بقى ما احنا مع بعض دلوقتى على طول عندنا اهتمامات تانيه والعيال والبيت والمستقبل :) تحياتى

Sameh M. Magdy said...

فعلا كل شحص بيبقي محتاج لمسة حنان من الشخص اللي بيحبة الراجل أو الست بس ليه الست بتخاف تطلب من الراجل ده هل هي العادات القديمة اللي اتربت عليها ولو غلط ليه مانصلحهاش

وفعلا مافيش اجمل من الحب

وخاصة إذا كان صادقا ومن القلب ينبثق

تحياتي

سهر الليالى said...

loverheart
فى عادتنا القديمه لا يوجد حقوق للست اصلا علشان تطلبها والكلام فى العواطف والمشاعر بيعتبروه بجاحه وقله ادب ده غير ان فى ناس كتير بتعتبر الحب ده عيبه كبيره وما تقدريش تكلمى عنها او ناس تانيه تقول ده كلام فاضى :) ما علينا قدرنا بقى هنعمل ايه
تحياتى

Lion king said...

السلام عليكم ورحمة الله وبركاته
كل سنه وانت طيبة

harmless said...

كثيرا ما نخلط بين تصرفات الواجب وتصرفات المشاعر

وننظر الى ما نحتاجه وننشد الاشباع بافعال من الطرف الاخر دون ان نهتم هل يؤديها كواجب عليه ام نتيجه مشاعر لديه

واسالك ما قيمة اى فعل فى علاقه مثل علاقه الرجل والمرأه اذا كان هذا الفعل ليس نتاج مشاعر حقيقيه وانما مجرد اداء واجب ولعدم اغضاب الطرف الاخر

هل يتبقى اى تأثير لهذه الافعال او هل يكون لها طعم او تحقق اى اشباع

اذا انقطعت الافعال لانقطاع المشاعر فلا تبحثى عنها فصدقينى لن يكون لها طعم ولن ترضيكى ولن تخدعك

Sameh M. Magdy said...

ماهو ده اللي قصدي عليه

وبعدين مافيش فرق بين الرجل وامرأته فلتطلب ماتشاء فهي لها الحق في الحب مثل الرجل ولماذا لاتطلب منه ذلك قد يعتبر الكثير انها زي ماقلتي قلة ادب والكلام ده بس الكلام ده او الفكرة دي لازم تتغير وكل واحد لو بدأ بنفسه أكيد هتتغير ككل

تحياتي

سهر الليالى said...

Lion king
وعليكم السلام ورحمه الله وبركاته.. وانت طيب ورمضان كريم

Tamer Nabil Moussa said...

طلبات كتير بس جميلة ومطلوبة بين الطرفين

وياريت كل طرف يكون فية عندة اهتمام بالطرف التانى مش مجرد طرف يدى وطرف يتفرج

تحياتى

أبو ضحى said...

هما امتى هيتعلموا يتكلموا لغة بعض..الستات و الرجالة
و لا هيفضل التفاهم بالاشارة و الحركات
و سوء التفاهم يفضل يزيد

Unknown said...

ايه الكلام الجامد ده دخلتي فعلا جوه كل ست
بوست حلو اوي وي

احساس لسه حى said...

عزيزتى
اهم شئ تعرفى هو عاوز ايه منك وتديله الاحساس اللى عاوزه منك بكده الرجل هيديكى كل اللى انتى عوزاه من احساس واكتر
الرجل لما بيحب اوى
بيعرف يحب بجد
سلام

سهر الليالى said...

هارملس
صدقنى انت لو ايقنت او تاكدت ان المشاعر انتهت تماما فلن اطلب ولن اناشد باى طلب ولكنى اقصد هنا بتغيير المشاعر اى اختفاء اللهفه والشوق ونظره الابهار والاعجاب واعنى ان تلك المرأه اصبح يراها زوجه فقط وليست الحبيبه ..انا هنا برفض التجاهل وبس:)))تحياتى

سهر الليالى said...

loverheart
طبعا مافيش فرق بين الراجل والست الاتنين عندهم مشاعر واحاسيس المفروض انهم لحم ودم ومافيش حد بلاستيك ولازم فعلا نغير من الافكار القديمه اللى جيبانا غلط دى ولا ايه:))تحياتى

سهر الليالى said...

Tamer Nabil
والله مش كتيره ولا حاجه يا تامر ده انت لو ساتلت الراجل عايز ايه من الست هيقول قد دول 10 مرات:))تحياتى

سهر الليالى said...

أبو ضحى
يا اهلا بيك مره تانيه انت كنت مقاطعنى ولا ايه:)).هيفضولوا طول الحياه بيتكلموا لغه مختلفه طبعا علشان لازم يبقى فى قط ويبقى فى فار والحياه يبقى ليها معنى :))تحياتى يا اسلام

سهر الليالى said...

EmY
ميرسى يا سكر وياريت اكون عرفت اعبر عن كل ست صح.نورتى المدونه وتحياتى

سهر الليالى said...

احساس لسه حى
الكلام ده كلام مظبوط بس فيه حاجه ذكاء الست يمكنها من معرفه احتياجاته وحبها ليه هيخليها تحسه وتفهم كويس اللى هو عايزه منها .:)تحياتى

raspoutine said...

عارفة اكيد الراجل بيسأل نفسه الاسئلة دى برضو
واكيد طلباته كتير
لكن الحل ساعات بيكون قدام الاتنين لكن هما مش شايفينو



بوست جميل
كل سنة وانتى طيبة

سهر الليالى said...

راسبوتين
اكيد برضه الراجل ليه طلبات كتيره لكن لو هو لمح ليها مجرد نلميح الست هتلبى لان هو كل الحياه وشاغل كل اهتمامها وهو ده الفرق بينها وبينه
رمضان كريم كل سنه وانت طيب
تحياتى

إبـراهيم ... said...

جميل جدًا . . .


و كل سنة و إنتو طيبين جميعًا :)

Coca said...

قريت البوست بتاعك عند ياسمين بس قولت ما بدهاش بقي ادخل اشوف صاحبه الكلام الجامد دا مدونه جميله
تحياتي

زوجه مفروسه said...

واضح ان الستات كلهم عايشين المعاناه دي
ليه؟ للأن أكيد من البدايه كان واحد فيهم مشاعره مزيفه
وكان عمال يحب في التاني عشان لازم يحبه
مش عشان شايف انه يستاهل حبه...

سهر الليالى said...

إبـراهيم ... معـايــا
ازيك يا ابراهيم عامل ايه والله زمان.كل سنه وانت طيب رمضان كريم

سهر الليالى said...

coca
اهلا وسهلا المدونه نورت والله:)
رمضان كريم

سهر الليالى said...

زوجه مفروسه
وازاى واحد يقدر يمثل انه بيحب حد وليه اصلا اللى يجبره على التمثيل والله حاجه غريبه فعلا اننا نقدر نعمل ده والرجاله دول لا يمكن تقدرى تفهميهم ابداااااا
تحياتى

أبو ضحى said...

انتى فينك..مستنين حاجة جديدة بقه
كفايه اكل كنافة و بسبوسة، و اكتبى حاجة جديدة

سلام

frozen love said...

post gamel..we e7sas 3aly wsl kl ely 2raaah

ana 2lt r2yey 3nd yasmen..bs kan lazm agy brdo we a2ol tany

•«ρяoιd»•™ said...

لا لا لا

كده قليل

اطلب اكتر

رمضان كريم

تحياتي

احساس لسه حى said...

عزيزتى
بتسالى ايه اللى اتغير
التغيرات اسبابها كتير اوى ومتتعدش
البطل الرومانسى يا مطحون
يا مكبوت يا الست وجعه قلبه
يا قلبه اتوجع من الدنيا
بس خدى بالك اللى بيحب مش لازم يعمل كل ده ممكن بتصرفات بعيده عن اللى تقوليه تحسى بحضه وحبه وحنيته
اللى بيحبوا بعض اوى
اروراحهم بتتكلم اكتر من لسانهم
سلام

سهر الليالى said...

أبو ضحى
ازيك يا اسلام كل سنه وانت طيب
والله ماليا فى الكنافه والبسبوسه دول خالص :))
تحياتى

سهر الليالى said...

frozen love
شكرا على الذوق العالى ده وطبعا نورت هنا وعند ياسمين :)تحياتى

سهر الليالى said...

•«ρяoιd»•
فيه اكتر طبعا كتير بس ده جر رجل بس هو ده اتحقق يعنى لما نطلب غيره :))تحياتى

سهر الليالى said...

احساس لسه حى
الاسباب اللى ذكرتيها دى مهمه بس ماتخليش الواحد يطحن لحد ماينسى نفسه
والحضن شئ ملموس لازم يحصل علشان تحسى بيه وكذلك الحب والحنان وعلى فكره مش بيبانوا فى النظرات ولا حاجه :))
تحياتى

•«ρяoιd»•™ said...

احيانا بنبقي مش عارفين عايزين ايه و لو عرفنا مش بنبقي عارفين اللي عايزينه ده هيحصل و لا لاء

بس المهم اننا زي م عايزين اننا يكون جوانا اننا كمان عارفين ان اللي حوالينا عايزين

يعني مش نقول هات و منديش

تحياتي

koukawy said...

لأ مش لازم تكون مشاعره اتغيرت
بس ممكن بيحصل بعض التغيرات و ده بسبب مشاكل الحياه و عوامل التعريه
و كلام من ده
لو رجعوا يفتكروا الأيام و الذكريات الحلوه دي هيعمل انتعاش من جديد

Unknown said...



شركة تنظيف فلل بالقطيف
شركة تنظيف شقق بالقطيف
شركة تنظيف مجالس بالقطيف
شركة تنظيف موكيت بالقطيف
شركة تنظيف سجاد بالقطيف
شركة عزل اسطح بالقطيف
شركة مكافحة حشرات بالقطيف
شركة تسليك مجاري بالقطيف