روايه لكاتب كبير تحولت لفيلم سينمائى شهير تطرح فكره الايمان بالحب الاول وهل هو حقيقه ام انه مجرد وهــــــــــم ؟ ويريد الكاتب من خلالها ان يوكد ان الحب الاول كذبه كبيره نعيشها .....الكلام ده معناه ان فى اكثر من حب ممكن يقابل الانسان بما ان فى حب اول يبقى اكيد فيه تانى ...ممكن المشاعر تتغير وتلاقى نفسك بتفكر ان اختيارك كان غلط وتقابل شخص تانى يملك قلبك من جديد وتشعر انه الحب الحقيقى الناضج الذى تحلم به
ولا ممكن تعيش عمرك كله تتنقل من حب الى اخر دون ان تجد الذى تبحث عنه ويرضيك
ولا الحب ده كلمه اخترعها البشر ليبرروا بها بعض افعالهم وتصرفاتهم
68 comments:
تتكلمى عن المشوشين والتائهين اعتقد
ومن منا لا يمر بفترات من التشويش والتوهان ولو كانت فترات قصيره من حياته ....اعتقد لا يوجد
تحياتى
إنتظري تعليقي على ببوست عن روعة الحب الاول وهتكوني أول واحدة حصريا تعرفي عنوان البوست القادم
عفوا حبيبي متقدرش ومتعرفش
انا متهيألي إنه مفيش حب بيتنسي
سواء حب أول أو أخير
واﻷكيد إن الإنسان بيحب أكتر من مرة
تحياتي
The Alien
انا كمان شايفه انه مافيش حب بيتنسى والامايبقاش حب اصلا
تحياتى
Shreif fahmy
منتظره تعليقك وردك ببوست جديد
تحياتى
صح لا يوجد
Mohamed A. Ghaffar
لا يوجد فعلا ولادى مجامله
:))))
تحياتى
ممكن الانسان يلاقي الحب
سواء في اول تجربة
او في خامس تجربة
ولكن التجربة الاولي لها طعم خاص
ليس في الحب فقط
ولكن في كل الاشياء
لا يوجد فعلاً - احنا بشر مش روبوت
مادام دخل في طي النسيان
اذن انه كان ليس حبات بل تعود
انا اعتقد ان الحب لو كان فعلا حب مش فترة مراهقة
يعنىلو حب فعلا بمعنى حب صعب جدا انه يتنسى
ممك الواحد يحب تانى لكن هيفضل الحب ده محتل جزء من القلب
Amr Ahmed
اكيد هيفضل يدور عليه لحد ما يلاقيه ..اما اول تجربه دى لوكانت مريره وصعبه برضه مش هتبقى عايز تنساها ؟ لااعتقد لو التجربه سيئه عقلك بيحاول يدفنها باى شكل ويمحى اى ذكرى لها ودى برضه فى كل حاجه مش الحب وبس
:))تحياتى
Mohamed A. Ghaffar
صح ...بس لوكنا روبوت مش كان يبقى اريح واحسن كتير
:))تحياتى يا باشا
مـحـمـد مـفـيـد
ده كلام مظبوط جداالحاجه الحقيقيه لازم تسيب فيك علامه تفضل معاك طول العمر ولا يمكن تنساهاابدا
تحياتى
مصر هى أمى
متفقه معاك ولكن عندى اعتراض مش بيحتل جزء من قلبك لان قلبك خده حد تانى هو بيحتل جزء من ذاكرتك ويتحول لذكرى جميله تسترجعها وتسعد بذكرهادائما...ولا ايه رايك انت
:)تحياتى
الحب الأول دوماً يرتبط بفتره المراهقه
فو يستمر احياناً
و كثيراً ينتهي قبل أن تبدأ علاقه حقيقيه
و لكن يبقي مذاقه موجود في الروح
لأنه كان أو من دق القلب له
تحياتي
مساء الفل والورد والياسمين عليكي يا اماني
حمدلله علي السلامه
موضوعك عايز مليون كلمه للتعليق
عن نفسي يمكن عندي حاله اضطراب في تعريف الحب
يللاسف فيه ناس بتقضي عمرها كله مع شخص وذللك لاعتقادها انها كانت تحبه
وسرعان ما تشتشف انه ليس الحب الحقيقي الذي تبحث عنه
وبالتالي تظل طول العمر تدفع ثمن لخطأ كان سببه في الاساس البدايه بين الطرفين
وعدم ترجمه المشاعر الاوليه بطريقه صحيحه
اما ان الواحد يظل يبحث طول العمر عن الحب
فدا فعلا صحيح
من بين الاف اليشر متزوجين او محبين
لو طرح عليهم سؤال واحد
هل هذا هو الحب الذي حلمت به وتمنيته
صدقيني هتكون الاجابه كلمه واحده
لا
ومتعرفيش السبب ايه؟
يمكن لانكشاف جوانب في شخصيه الناس بعد ارتباطهم تساعد علي التنافر بينهم
يعني الصور بتتغير وكل شيء بيتغير
اما كلمتك الاخيره ان الحب احساس اخترعناه؟
فأنا هقولك
الحب زي الكنز المدفون وكل شخص بيبحث عنه اما يلاقي او يفشل
لكن هو موجود
بس المشكله في البحث عنه
تحياتي ليكي يا اماني
ومتغيبيش علينا كدا تاني
الحب الأول والأخير واللى فى النص كمان .. وهم كبير يا سيدتى الحسناء
هى دى الحقيقة للأسف اللى فى ناس حظها حلو ومش بتعرفها ابدا وفى ناس حظهم وحش وانتى عارفاهم كويس وبيعرفوا دة من بدرى .. للأسف
تحياتى
اولا فعلا لا يوجد من ينسى اول حب يمس قلبه
حتى اننى استطيع ان اقول انه لا يوجد شخص نسى حتى مناغشاته القلبيه
المراهقيه
لكن احقية الحب الاول وان لا بعده حب
اشك فيها
لكن كل حب ...يملك فى القلب حب
وذكرى
تحياتى
اولا حمدلله علي السلامة
ثانيا لما نقول عن حب انه وهم يبقي ما كنش حب يبقي اي حاجة تانية وحتي الحاجة التانية صعب انها تتنسي الحب لا ينسي لانه بيسيب علامة في القلب
تحياتي
ρroιd
مشاعر المراهقه بيبقى ذكرى جميله تبتسم عند ما تتذكرها ولكن تعتقد ان تلك المرحله بها احاسيس ومشاعر صادقه لدرجه ان تسميه حب ام انها مرحله تقلبات وتغيرات وبناء و تكوين شخصيه
تحياتى
gohayna
ازيك يا سكره الله يسلمك ياقمر
والله عندك حق فعلا فيه ناس تعيش العمر تعيسه بسب اختيار غلط او انها تخيلت انها قابلت الحب وبعد ماتكتشف غلطها ماتقدرش تتراجع..اما انهم يبحثون عن الحب باستمرار فانا اعتقد ان ده سببه ان الانسان لا يعلم قيمه ما يملك وانما يتطلع لاكتساب وامتلاك المزيد حالات عدم الرضا والقناعه يعنى والله اعلم:))))
تحياتى
ياسمين
الاول والاخير واللى فى النص كمان يا ياسمين حرام عليكى ماخلتيشس حاجه واحده حقيقه ليه الاحباط ده انا وانت عارفين الكدبه والوهم ده كويس بس الناس التانيه تصدميهم ليه مش تسبيهم موهومين شويه يلا حصل خير يا قمر :))وحشانى
شيماء الجيزى
اصبت ياشيماء لكل حب ذكرى تحفر داخل القلوب
:)تحياتى
sendbad
الله يسلمك يارب..انا كمان قلت الكلام ده لمحمد مفيد فى ردى عليه وده كلام مظبوط جدا
:)تحياتى
حضرتك عايزة رايى اذا كان هيحتل جزء من قلبى ولا من عقلى
افتكر الاتنيين بيوصولا لنفس النتيجة ان الشخص ده بيحتل جزء من كيانى ومتقدريش تخرجيه نهائى
مصر هى امى
رايك مظبوط طبعا لكن لاتنسى ان الحب يحتل ويمتلك كيانك ووجدانك باكمله الى ان يصبح ذكريات
تحياتى
والله يا أمانى المشكله مش فى الحب الاول
المشكله فى تحديد من كان الحب الاول
اول فتاة احببتها كنت فى اول اعدادى وانا حتى لا اتذكر ملامحها
والحب الثانى لو رأيتها اليوم ما عرفتها ولا عرفتنى
والحب الثالث اراها كثيرا لانها قريبتى ودائما اتساءل كيف كنت احب هذا المخلوق البشع
والحب الرابع هاجرت امريكا واراها احيانا من بعيد فى الاجازات فى النادى واشعر انها فى رجيم قاسى للنزول بوزنها الى المائه والعشرين كيلو
لكن بداية من الحب الخامس ومايليه فالموقف معقول
فيه ذكريات وفيه مشاعر وفيه امكانية تجديد ما انتهى واحياء ما مات
بس برضو المشكله هى هى
مين اللى ممكن اسميه الحب الاول؟
أعتقد بأن الحب الاول في الغالب يحدث أثناء فتره المراهقه حيث تكون المشاعر و الاحاسيس غير مكتمله و بالتالي نكتشف أنه سرابا فيما بعد
تحياتي لكي
harmless
كل دول يا هارملس وكل واحده كنت بتشعر تجاهها بمشاعر واحاسيس تسميها حب انا مافتكرش انه حب خالص ممكن تسميه استلطاف او اعجاب او حتى انبهار علشان كده مابتفتكرهاش ولوافتكرتها بتستنكر وجودها فى الماضى والحاضر كمان ...اعتقد ان الحب الحقيقى لا يتكرر كثيرا فى حياتنا اما مين تقدر تقول عليها الحب الاول هى واحده اول ماعنيها جت فى عينك خطفتك وضربات قلبك زادت ولقيت نفسك فاكرملامحها كويس قوى مش قادر تبطل تفكير فيها مش قادر تبطل كلام عنها هتجنن وتشوفها تانى هتجنن وتكلمها نفسك تلمسها نفسك تضمها محتاجلها على طول تكون جنبك شايفها احلى واعظم ست فى الوجود مش شايف عيوبها وحاجات كتيره قوى لو لقيت ده فى واحده من اللى عدتهم تبقى هى دى
فيه ولا ايــــــــــــــــه
:))))تحياتى
micheal
والله يا مايكل عندك حق ...بس فيه حب بيبقى مش فى سن المراهقه وبرضه بيطلع سراب ووهم كبير للاسف
:)
تحياتى
كل واحد منا عدة علية فترة كان مشوش فيها
بس المهم مين بيقدر يخرج من الحالة دي ومين بيستمر
للحب مكان كبير في القلب و لكن الحب يدمره التجاهل و سوء التصرف وبالتالي هنبدا حب تاني و هكذا
ولكل حب مكان في القلب قد يستيقظ في وقت لا تريده ولكنه موجود دائما
وكما قال مش عارف مين و ما الحب الا للحبيب الاول
معناها ان حلاوه الحب في الحب الاول بس بعد كده في حب ممكن يكون اقوي منه حتي
تحياتي
اه في بشر بتبرر حاجات باسم الحب
و موضوع ان الواحد بيندم و يتريق علي نفسه لما يلاقي بعد كده الحب اللي كان مقسومله بجد اه طبعا موجود
الشطان يعظ
عندك حق طبعا ودى كان كلامى برضه لمحمدعبد الغفار لكن ممكن تعدى بيك اوقات من التشويش فى مراحل اخرى من الحياه وفى مراحل النضوج ايضا لكن هنا بتبقى السيطره والعوده الى التفكير السليم اسرع من فترات المراهقه
تحياتى ونورت المدونه
عبدالله
حمدلله على السلامه طولت الغيبه ليه
يمكن يكون كلام اسمه ايه ده مظبوط الله اعلم بس لاحظ ان فى ناس ممكن تنسى مين هو الحب الاول زى هارملس كده مثلا
تحياتى
koukawy
اذا كان على الناس اللى بيبررواحاجات كتير باسم الحب فانا متاكده من وجودهم ودول كتير قوى قوى وبرضه الناس اللى بتتريق على نفسها علشان تجارب مرت عليهم واعتقدوا انها حب برضه موجودين وانا واحده منهم على فكره :)))) تحياتى ياسكر
لا أؤمن بالحب الأول
لأن كل شئ في الدنيا كي يظهر كاملاً يجب أولاً ان ينضج
والحب الأول مجرد بذرة داخل الانسان
غير ناضجة
تنضج بالتجارب
بالري
بالشمس
انا بعتبر ان لو فيه حب أول
تبقى مجرد صدف
مش قاعدة
قادر أن أحب و أن أنسى و أن أحب و أن أنسى و أن أحب و أنسى
ده ردى على سؤالك
تحياتى
إبراهيم محسن
الحب الاول ليس بالضروره يكون حب المراهقه فكيف لا تؤمن به حين ياتى فى اى عمر تمر به ...
تحياتى
أبو ضحى
يا اهلا يا اهلا ازيك ايه اخبار الغيبه طولت قوى
كام مره كده هتقدر تحب وتنسى ؟؟؟اقولك انا لحد ما تحب بجد حب يلغى ما سبقه ويحوله لمجرد ذكريات تخرج من داخلك على فترات متباعده لثوانى قليله ثم تعود وتدفن داخلك من جديد
تحياتى
فينك وفين بوستاتك
اسئلة محيرة جدا فعلا ومالهاش اى اجابات عندى
لأنى اصلا معرفش الحب اللى بتتكلموا عليه ده طعمه ايه
لا أول ولا تانى ولا 15 حتى
:D
تحياتى
امانى ازيك
اخبارك ايه
انا جايه بدعوك للقاء المدونين فى بورسعيد
ولمزيد من التفاصيل ادخلى مدونتى
واتمنى من كل المدونين التفاعل معاها
تحياتى
تحياتي
في رأيي أن الحب الحقيقي بيكون في حياتنا مرة واحدة فقط لاغير....اما ما قد نشعر به من مشاعر أخري فقد يعود الي التعود...الي العشرة...الي انه ليس بالامكان أحسن مما كان...الخ.
الحب نبته مشاعر...تبذر في قلبي المحبين..
و تروي بمواقف جميلة مشتركة من الجانبين
و تترعر في ظلال التفاهم المشترك و تنضج في عش الزوجية.
تحياتي و تمنياتي بالسعادة لك و للجميع
sendbad
ميرسى على السؤال وانا موجوده بس عارفه انى مقصره شويه وكسلانه
:))
تحياتى
انسانه
الحب طعمه حلو قوى ومسكر بس فى الاول بس وبعد كده شويه مر وشويه حلو
بكره تجربيه وتبقى تقولى رايك
:)))
تحياتى
شيماء الجيزى
ازيك ياقمر ايه اخبارك
ربنا يسهل ولو ان بور سعيد بعيده عليا شويه ماخبيش عليكى
تحياتى
الربان
انا معاك الى حد كبير وانا قصدت هنا ان الواحد مننا يعتقد انه هو ده الحب الحقيقى ويكتشف بعد ذلك انه كان مجرد مشاعر غير ناضجه بعد لقائه بمشاعر اكثر نضجا واكثر قوه وحينها ينكر الحب الاول
تحياتى
انتى فينك من زمان اصلا ؟ّّ
دلوقتي تقدري تشوفي تعليقي على البلوست بتاعك إنتهيت من كتابة الجزء الأول من
عفوا حبيبي متقدرش ومتعرفش
الحب الاول عمرنا ما بننساه كان بقى فى سن ال16 او ال20 مش فارقة لكن هو بيبقى حب بجد ولو بقى محصلش نصيب ومكملتش العلاقة برضه مش بننساه ولو نسيناه وحبينا تانى بيبقى برضه اسمه الحب الاول طالما العلاقة الاولى اتنست .. وعلى فكرة انا حد مرة كلمنى انه بيحب اتنين فى وقت واحد ومش قادر يستغنى عن واحدة منهم ياترى ده اسمه ايه .. ممكن دى تتناقش ؟؟ عشان عايزة افهمها وهل فعلا حد ممكن يحي اتنين فى وقت واحد ؟؟
السلام عليكم
الحب هو الفطره اللي ربنا خلقنا عليها كلنا
يعني مش من اختراع البشر
اما بقي الحب الأول
فمعظم حالات الحب الأول اه بتكون في سن المراهقه
و رغم كده بتظل ذكرياته محفوره
مش كتير بيكون مصيره الأستمرار
بس في نفس الوقت بيكون اول مره القلب فيها بيدق بالحب
فبيفضل محفور في الذاكره
تحياتي
مافيش حب بيتنسي
لو اتنسي ميبقاش حب حقيقي
حب الناس وعيش حب متتنسيش
اولا الف حمدالله على سلامتك
ثانيا
عجبتنى اوى كتابتك بجد
والجزء دة بالذات
ولا الحب ده كلمه اخترعها البشر ليبرروا بها بعض افعالهم وتصرفاتهم
حتي لو كانت كزبة فهي أحلي كزبة صدقيني أروع احساس الواحد فينا بيعيشه ولحد دلقوتي لسه فاكر اما كنت بنزل وقت الامتحانات وامشي اتنين كيلو عشان اشوفها وهي طالعة من الدرس ولسه حاطط منديلها في محفظتي رغم اني واخده منها من سبع سنين
صدقيني احساس ممكتع اوي حتي ولو كان كازب
Mirage
انا موجوده هنا على طول ومش بمشى
:)تحياتى
شريف فهمى
حالا هشوفه ياشريف واسفه على التاخير
تحياتى
bocycat
ايوه مش بتنسى بيقى ذكريات وبس
اما ان الواحد يحب اتنين شى غريب وصعب وعلى فكره عندى صديق قالى نفس الكلام واضح ان دى مباح وطبيعى لدى الرجال فقط ساعات بيتهيالى ان قلوب الرجال مقسمه الى 4 ارباع كل ربع يحب واحده ست حسب الشرع يعنى وكل واحد وطاقته بقى ..لكن عمرى ماشفت بنت اوست بتحب رجلين فى وقت واحد لان الرجل يحتل قلبها وعقلها وحين تحبه لا ترى رجالا اخرين
والله اعلم فالبشرنماذج و انواع مختلفه
تحياتى
ρяoιd
لو كان الحب فطره ليه فى ناس تعيش وتموت من غير ماتعرفه ولاتقابله
فعلا بيفضل محفور فى الذاكره بكل حلاوته ومرارته
تحياتى
نورهان مفيد
هى دى الحقيقه لوكان حب مش ممكن يتنسى
تحياتى
الغزالى
ميرسى قوى ...كتبت الجمله دى لانى دايما بسال نفسى ليه فيه ناس تدخل فى علاقه باسم الحب ويكون الاغراض مختلفه تماما والاهداف كمان وتستعمل لفظ الحب كغطاء
مش عارفه قدرت اوصلك الفكره ولا لا
:))
تحياتى
دكتور مستكنيس
الاحاسيس الحلوه والمشاعر الدافئه البريئه اللى بتولد مع الحب الاول فى سن صغير لها بريقها ورونقهاوذكرياتها بتفضل تطل علينا من وقت لاخر وتسعد بها كثيرا
تحياتى
One thing is for sure. I will never forget.
إزيك يا سهر
انا من رأئي
ان الوسادة الخالية
افضل كتير
من الوسادة المليانة
ياما نفسي وسادتي تخلي
الاقيش عندك وسادة مخلية ؟
Anonymous
كل شى بيتنسى اكيد اكيد
تحياتى
طهقان
ازيك يا طهقان باشا
صحيح الوساده الخاليه ساعات بتبقى احسن كتير من المليانه بحد مش موجود اصلا الا على الوساده وبس ومش موجود فى قلبك ولا ليه تاثير فى حياتك
هسأل واقولك على الوساده المخليه ولو لقيت هبقى احجزاتنين
تحياتى
Post a Comment